जनहित प्रतिष्ठानच्या १०५ विद्यार्थ्यांनी घेतला पोलीस कामकाजाचा प्रत्यक्ष अनुभव; ‘गुड टच-बॅड टच’, व्यसनमुक्ती व सुजाण नागरिकत्वावर विशेष जनजागृती
बारामती, दि. ९ जून २०२६ (प्रतिनिधी): बारामती शहर पोलीस स्टेशन येथे आज जनहित प्रतिष्ठानच्या प्राथमिक विद्यालयातील १०५ विद्यार्थी व १० शिक्षकांनी शैक्षणिक भेट देत पोलीस विभागाच्या विविध कामकाजाची प्रत्यक्ष माहिती घेतली.
दुपारी २ ते ३ या वेळेत झालेल्या या प्रशिक्षण व जनजागृती उपक्रमात विद्यार्थ्यांना कायदेविषयक जागरूकता, सायबर सुरक्षा, वाहतूक नियम, बाल संरक्षण, व्यसनमुक्ती, व्यक्तिमत्त्व विकास आणि सुजाण नागरिकत्व या विषयांवर सविस्तर मार्गदर्शन करण्यात आले.
या भेटीचा मुख्य उद्देश विद्यार्थ्यांना पोलीस विभागाची कार्यपद्धती समजावून सांगणे, पोलिसांविषयी असलेला अनाठायी धाक दूर करणे, कायद्याबद्दल आदर निर्माण करणे आणि भविष्यात जबाबदार नागरिक घडविणे हा होता.
यावेळी विद्यार्थ्यांना तक्रार कक्ष, पासपोर्ट पडताळणी विभाग, गोपनीय शाखा, मुद्देमाल कक्ष, लॉकअप रूम, चरित्र पडताळणी विभाग, तपास पथक, सीसीटीएनएस प्रणाली, स्टेशन डायरी आणि नागरिक सेवा विभाग आदी शाखांची प्रत्यक्ष माहिती देण्यात आली.
नागरिकांच्या तक्रारींची नोंद, गुन्ह्यांचा तपास, पुरावे जतन करण्याची प्रक्रिया आणि विविध पोलीस सेवा कशा दिल्या जातात याचे प्रात्यक्षिक स्वरूपात मार्गदर्शन करण्यात आले.
बालकांच्या सुरक्षिततेच्या दृष्टीने ‘गुड टच’ आणि ‘बॅड टच’ या महत्त्वपूर्ण विषयावर विद्यार्थ्यांशी संवाद साधत सुरक्षित व अयोग्य स्पर्शातील फरक समजावून सांगण्यात आला. तसेच अशा प्रसंगी पालक, शिक्षक किंवा पोलीसांची मदत कशी घ्यावी याबाबत मार्गदर्शन करण्यात आले.
विद्यार्थ्यांना तंबाखू, गुटखा, सिगारेट, मद्यपान व इतर व्यसनांचे दुष्परिणाम समजावून सांगून व्यसनमुक्त जीवनशैलीचा संदेश देण्यात आला. चुकीच्या संगतीमुळे शिक्षण व भवितव्यावर होणारे परिणाम स्पष्ट करत चांगल्या सवयी, शिस्त आणि सकारात्मक विचारांचे महत्त्व अधोरेखित करण्यात आले.
वाहतूक सुरक्षेअंतर्गत रस्ता सुरक्षितपणे ओलांडणे, झेब्रा क्रॉसिंगचा वापर, वाहतूक सिग्नलचे पालन, हेल्मेट व सीट बेल्टचे महत्त्व तसेच अपघात टाळण्यासाठी आवश्यक खबरदारी याविषयी माहिती देण्यात आली.
सायबर गुन्ह्यांबाबत जागरूकता निर्माण करण्यासाठी सोशल मीडिया, ऑनलाईन गेमिंग, फेक लिंक, ओटीपी फसवणूक, बनावट वेबसाईट, अकाउंट हॅकिंग आणि ऑनलाईन आर्थिक फसवणूक यासारख्या विषयांवर विद्यार्थ्यांना मार्गदर्शन करण्यात आले. कोणतीही वैयक्तिक माहिती अनोळखी व्यक्तींना देऊ नये आणि संशयास्पद लिंकवर क्लिक करू नये, असे आवाहन करण्यात आले.
याशिवाय विद्यार्थ्यांना पोलीस विभागाकडे उपलब्ध असलेल्या विविध शस्त्रांची माहिती देण्यात आली. त्यांचा वापर, सुरक्षित हाताळणी आणि कायद्याच्या चौकटीत नागरिकांच्या संरक्षणासाठी त्यांचा कसा उपयोग केला जातो याबाबतही माहिती देण्यात आली.
कार्यक्रमादरम्यान विद्यार्थ्यांनी उत्स्फूर्त सहभाग नोंदवत विविध प्रश्न विचारले. पोलीस अधिकारी व अंमलदारांनी त्यांच्या शंकांचे समाधानकारक निरसन केले.
हा उपक्रम पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक गणेश बिरादार तसेच बारामती विभागाचे उपविभागीय पोलीस अधिकारी डॉ. सुदर्शन राठोड यांच्या मार्गदर्शनाखाली आयोजित करण्यात आला. बारामती शहर पोलीस स्टेशनचे पोलीस निरीक्षक श्रीशैल रामचंद्र चिवडशेट्टी यांच्या संकल्पनेतून व मार्गदर्शनाखाली हा कार्यक्रम यशस्वीरित्या पार पडला.
बारामती शहर पोलीस स्टेशनतर्फे अशा जनजागृतीपर उपक्रमांद्वारे विद्यार्थी, पालक आणि नागरिकांमध्ये कायद्याविषयी जागरूकता निर्माण करून पोलीस व नागरिकांमधील विश्वास अधिक दृढ करण्याचा प्रयत्न सातत्याने केला जात असल्याचे यावेळी सांगण्यात आले.
बारामती शहर पोलीस स्टेशन येथे जनहित प्रतिष्ठानच्या विद्यार्थ्यांना पोलीस कामकाज, सायबर सुरक्षा, वाहतूक नियम व व्यक्तिमत्त्व विकासाबाबत मार्गदर्शन करताना पोलीस अधिकारी.
