🚨 फलटण उपजिल्हा रुग्णालयात १८ वर्षीय युवतीसोबत गैरवर्तन; ओळखीच्या तरुणाविरुद्ध गुन्हा दाखल 🚨

प्रतिनिधी – नेहा पवार 

फलटण (जि. सातारा) : फलटण येथील उपजिल्हा रुग्णालयात उपचार घेत असलेल्या १८ वर्षीय युवतीसोबत गैरवर्तन झाल्याची गंभीर घटना उघडकीस आली आहे. या प्रकरणी संबंधित तरुणाविरुद्ध फलटण शहर पोलीस ठाण्यात गुन्हा दाखल करण्यात आला असून तपास सुरू आहे.

तक्रारदार युवती (वय १८) ही फलटण येथे शिक्षण घेत असून १८ मार्च २०२६ पासून ती इंटर्नशिपसाठी ये-जा करत होती. दिनांक ८ एप्रिल २०२६ रोजी सकाळी सुमारे ८ वाजता तिला चक्कर आल्याने फलटण येथील उपजिल्हा रुग्णालयात दाखल करण्यात आले. त्यानंतर तिच्यावर उपचार सुरू होते.

दिनांक ९ एप्रिल रोजी दिवसभर उपचार घेतल्यानंतर रात्री सुमारे ९ वाजण्याच्या सुमारास, तिच्या ओळखीचा अभिषेक अशोक सोंडके (रा. सोमंथळी, ता. फलटण, जि. सातारा) हा रुग्णालयात आला. त्यावेळी तो युवतीच्या बेडजवळ बसून तिच्याशी बोलू लागला.

तक्रारीनुसार, आरोपीने सुरुवातीला तिची विचारपूस केली. त्यानंतर अचानक तिच्या गळ्याला हात लावला तसेच तिच्या मांडीवरून हात फिरवत अनुचित वर्तन केले. एवढेच नव्हे तर “तू सिंगल आहेस का?” असा वैयक्तिक प्रश्न विचारून तिला अस्वस्थ केले. या प्रकारामुळे युवती घाबरली व तिला मानसिक धक्का बसला.

घटनेनंतर युवतीने तात्काळ आपल्या आई व भावाला माहिती दिली. त्यानंतर कुटुंबीयांसह फलटण शहर पोलीस ठाण्यात जाऊन संबंधिताविरुद्ध तक्रार दाखल करण्यात आली. पोलिसांनी या प्रकरणाची नोंद घेतली असून

आरोपीविरोधात पुढील कायदेशीर कारवाई सुरू आहे.
दरम्यान, रुग्णालयासारख्या संवेदनशील ठिकाणी अशा प्रकारची घटना घडल्यामुळे नागरिकांमध्ये संताप व्यक्त केला जात आहे. रुग्णांच्या सुरक्षेचा प्रश्न ऐरणीवर आला असून रुग्णालय प्रशासनाने सुरक्षा वाढवण्याची मागणी होत आहे.